s al còr de las Corbièras prèp de Tuissan, dins un paisatge rocassut al mièg de la garriga que se quilha lo castèl d'Aguilar.

Sas roïnas conservan encara tota la noblesa e la fòrça que lo castèl deviá aver al temps de son esplendor.

A l'epòca de la Crosada contra los Albigeses, es somés al meteis sòrt que la màger part de las fortalesas de la region, e passa dins las mans del rei de França, que lo restituirà qualquas annadas aprèp a son proprietari Olivièr de Tèrme en 1250.

Aquel Olivièr lo tornarà vendre al rei Loís IX dètz ans mai tard !!!

Aprèp la crosada Aguilar pren una granda importància estrategica pels reis de França, e ven un dels celèbres "Cinc Filhs de Carcassona" que susvelhan de prèp la frontièra amb lo reialme d'Aragon. Mas Aguilar es mal entretengut, e s'arroïna rapidament. Sembla ja èsser en mal estat en 1542, segon un tèxte que nos conta de combats a l'entorn.

Es classificat coma Monument Istoric en 1949.

La primièra mencion del "Puig Agilar" data de l'annada 1020. S'agís d'un acte de donacion del comte de Besalú, Bernat Tallaferro a son filh ainat.

A la fin del sègle 11, passa als vescomtes de Carcassona, e al començament del sègle 12, aparten a la familha poderosa de Tèrme, familha vassala dels Trencavèls de Carcassona.

L'ensemble se compausa de doás encenchas concentricas, separadas per liças. La primièra muralha es un exagòn irregular, defendut a cada canton per de tors semi-circularas dobertas "a la garganta". Aicí coma a Carcassona, lo sistèma de defensa es plan elaborat : arquièras, balestièras dispausadas a la crosada, apparelh de pèiras embotidas...

La pòrta occidentala que data del sègle 14 permet d'accedir al castèl, e se trapa fàcia a la capèla Santa Anna. Aquel edifici pichon del estil romanic se quilha en defòra de las fortificacions !

La muralha interiora consèrva qualques vestigis del castèl primitiu del sègle 12 (d'abans la Crosada).

La Tor de l'Omenatge, de plan rectangular, deviá servir coma domnon. S'i pòt observar de rèstas de vòutas en breçòl dins la sala del planpè. Una cistèrna bèla ocupa lo sòtol.

Pais Catar > Cinc Filhs > Aguilar
Capèla Sta Anna
Tor de l'Omenatge