Cal conéisser las doas parts d'aquela vila per comprene plan ben çò qu'es Carcassona !
La Bastida Sant Loís, qu'es l'autre nom de la Vila Bassa, es lo centre comercial e administratiu de Carcassona. Mas malgrat aqueste títol pauc atrasent, es una vila fòrça anciana que ofrís al visitaire que pren la pena de badar per sas carrièras un fum de tresaurs istorics e arquitecturals.
La visita de la Bastida Sant Loís
Se pòd divisir nòstra visita en tres parts, que correspondon als tres centres d'interès principals de la Bastida : los edificis religioses, los ostals particulars e los autres monuments ancians, coma la Pòrta dels Jacobins o los Bastions...
La Bastida comptava un nombre grand de glèisas e capèlas abans la Revolucion. Ne demòra qualquas unas plan interessantas. La glèisa Sant Vincenç es plan segur lo simbòl de la Vila Bassa, amb son cloquièr tan naut que se vei de luènh. Ela possedís la nau mai larga de Lengadòc !
Als sègles XVII e XVIII, Carcassonna èra plan coneguda per son industria textila que faguèt prosperar la vila, e mai particularament qualquas familias de la noblesa e borgesia locala. Aquelas familias nos daissèron coma eiretatge un fum d'ostals amb una arquitectura classica, tipica d'aquels sègles. Totes possedon de corts e reirecorts, d'escalièrs e pòrtas monumentals.
Los melhors exemples d'aquesta arquitectura en vila bassa son de segur la Comuna (ostal de Roland), l'ostal de Murat o tanben l'ostal de Roux d'Alzonne que son plan conservats. Mas la Bastida possedís encara fòrça autres ostals mai discrets que cal descobrir en passejant per las carrièras...
I a d'autres lòcs d'interès per los qu'an léser de se passejar per las carrièras de la Bastida, testimònis de la longa istòria de Carcassona.
La Pòrta dels Jacobins, que foguèt quilhada a l'entrada sud de la vila pel avesque Bazin de Bezons al sègle XVIII, remplaça une anciana pòrta gotica.
Los tres bastions (St Martin, de Montmorency e Torre Gròssa o Torre dels molins) son tot çò que nos resta de las muralhas de la Bastida, desrocadas pel meteis avesque ! Datan del sègle XVI.
Los Cobèrts son tanben un dels centres de la vida activa de Carcassona. Datan del sègle XVIII, e son totjorn de servici dempuèi mai de dos cents ans !
Cal pas oblidar tampauc de dire qualques mots sul monument que fa lo ligam entre la doas parts de Carcassona : lo Pont Vièlh. Foguèt quilhat en 1355, e demorèt fins al sègle XIX lo mejan unic per traversar Aude sens se banhar los esclòps ! Simboliza uèi lo ligam entre las doas vilas, mas foguèt longtemps lo simbòl de l'oposicion e de la concurréncia entre Bastida e Ciutat...
