Carcassona en occitan

Començam amb la part que fa la glòria de Carcassona a travèrs lo mond entièr... Ciutat

La visita de Ciutat

Amb sa dobla muralha de 3 km e sas 52 torres, Ciutat es l'exemple perfèit d'una vila fortificada medievala.

Construida sus un puèg que domina Aude, foguèt totjorn un punt estrategic fòrça important dempuèi l'Antiquitat. Se trapan encara de traças cèlticas e romanas, e particularament de mosaics polits que provenon d'una villa, jos las fondamentas del Castèl Comtal.

Las fortificacions interioras de l'encencha nòrd, dins las Liças Bassas, datan tanben d'aquel periòde antic.

Aquelas torres bassas, semi-circularas amb sas oberturas largas, adaptadas a las armas romanas, nos permeton d'imaginar cossí foguèsse la vila dins los primièrs sègles de nòstra èra. Carcassona deviá encara aver lo meteis aspècte a l'Edat Mejana, a l'epòca dels Trencavèls. Las vièlhas muralhas èran totjorn de servici !

Es pas qu'aprèp la crosada que la segonda linha de fortificacions foguèt quilhada pels franceses. Volián faire de Carcassona una fortalesa de primièr òrdre, fàcia la frontièra aragonesa... mas tanben fàcia los occitans qu'avián pas encara acceptat los mèstres novèls !

La màger part de las fortificacions de Carcassona datan de l'epòca francesa, de las annadas 1260 - 1280. Las Liças Nautas nos mòstran una arquitectura plan diferenta. Fan la virada de la fortalesa del sud oèst al sud èst, de las Pòrtas Narbonesas fins a la Pòrta d'Aude e lo Castèl Comtal. Las torres son fòrça mai nautas, e generalament de fòrma circulara. Es dins aquesta part que son las torres mai importantas : la Torre de la Vada, que podiá téner un sètge tota sola, amb son potz e son forn, la Torre e Pòrta de Sant Nazari, qu'es pas circulara mas qüadrangulara, la Torre de l'Avesque, ont aquela personalitat importanta dispausava d'una sala.

La Pòrta d'Aude presenta un sistèma defensiu particularament sofisticat. Caliá èsser valentós per poder dintrar dins Ciutat ! Es una succession de pòrtas falsas, contorns, machacoladuras e autras doçors que esperavan l'enemic !

Lo Castèl Comtal es una vertadièra fortalesa dins la fortalesa ! Es la darrièra defensa de Ciutat, que sas construccions mai vièlhas datan de l'epòca dels vescomtes. Foguèt de contunh modificat sègle aprèp sègle, particularament pels franceses que'n faguèron aquel immens edifici que s'impausa a tota Ciutat ! Lo castèl foguèt tanben lo sèti dels senescals de Carcassona, una casèrna, una preson, e per finir un musèu ont se pòdon ara descobrir totes los testimònis de l'istòria audenca : escalpraduras, tombèls, croses, veirials, frescas, e tanben una polida mòstra sus las restauracions de Ciutat al sègle passat.

Se i a un monument dins Ciutat que cal pas mancar, es la Basilica Sant Nazari e Sant Celse. Es lo joièl de Carcassona. Aquesta glèisa foguèt catedrala de Carcassona dempuèi sa fondacion en 1096, fins a 1802, quand lo sèti de l'avescat davalèt dins la Vila Bassa, a Sant Miquel.

Sant Nazari es un mescladís (!) estranh mas armoniós dels estils romanic (la nau) e gotic (los crosièrs e lo còr) importat del nòrd de França.

Se ditz que los veirials de la Basilica comptan demest los mai bèls de tota l'Occitania (l'arbre de vida, l'istòria de Nazari e Celse, las ròsas, ...) ! An mai de 700 ans !

La Basilica amaga tanben qualques tresaurs, coma lo tombèl de l'avesque Pierre de Rochefort, la capèla de Radulphe, la pietà policròma, e los òrgues que son los mai ancians del sud de França.

E per finir, cal pas oblidar de passejar per las carrièras de Ciutat, que nos resèrvan qualquas suspresas, ostals ancians, pichonas plaças, poses, luènh de la multitud dels toristas...